Ish-sulmuesi i Juventus, Fabrizio Ravanelli, ka kritikuar ashpër repartin ofensiv të bardhezinjve, duke vënë në pikëpyetje kontributin e Jonathan David dhe duke sugjeruar ndryshime të mëdha në merkato.
Sipas tij, skuadra e drejtuar nga Luciano Spalletti po vuan mungesën e një “numri 9” të mirëfilltë, që të bëjë diferencën në momentet vendimtare.
“David nuk është për Juventusin”
Ravanelli u shpreh i prerë për sezonin e sulmuesit kanadez, duke theksuar se ai nuk e ka përballuar dot kalimin në një nivel më të lartë.
“Është një sezon negativ. Ka shënuar disa gola, por nuk është lojtari i duhur për të fituar Champions apo kampionatin. Te Juventusi duhet personalitet i fortë, karakter dhe vendosmëri”, deklaroi ai.
Jo Levandovski, po Osimhen
Në lidhje me përforcimet e mundshme, ish-sulmuesi italian nuk e sheh si zgjidhje afrimin e Robert Lewandowski, pavarësisht eksperiencës së tij.
“Do të ishte një hap pas. Juventusi ka nevojë për lojtarë me të ardhme, jo për një 38-vjeçar”, u shpreh Ravanelli.
Në vend të tij, ai sugjeron afrimin e Victor Osimhen, duke e konsideruar si profilin ideal për sulmin bardhezi, edhe pse pranon se operacioni është i vështirë për shkak të kostos.
Gjithashtu, ai përmendi edhe Gabriel Jesus si një alternativë të vlefshme, si dhe mbështeti idenë për investim te talentet e rinj.
Besim te të rinjtë dhe baza e skuadrës
Ravanelli vlerësoi potencialin e Kenan Yıldız, duke e cilësuar si “fenomen” dhe pikënisjen për ndërtimin e skuadrës së ardhshme. Ai përmendi gjithashtu si elementë kyç për të ardhmen Gleison Bremer dhe Francisco Conceição.
Ndërkohë, ai shprehu vlerësim për Moise Kean, duke theksuar se italiani ka potencial të madh, pavarësisht problemeve me dëmtimet.
Në fund, Ravanelli theksoi se Juventusi duhet të rikthehet te identiteti i tij historik: një skuadër me konkurrencë të fortë në sulm dhe lojtarë me uri për sukses.
