Drejtori i FBI, Kash Patel, ka reaguar pas të shtënave gjatë darkës së Shoqatës së Korrespondentëve të Shtëpisë së Bardhë, duke falënderuar forcat e rendit për ndërhyrjen.
Në një deklaratë në rrjetet sociale, ai vlerësoi reagimin e autoriteteve, duke theksuar se “mbrëmë pamë më të mirën e lidershipit amerikan”.
“Jam krenar që punoj për presidentin Donald Trump, i cili mbështet fuqimisht zbatimin e ligjit – dhe krenar që drejtoj këtë agjenci që punon 24/7 për të mbajtur amerikanët të sigurt,” u shpreh Patel.
Ai bëri të ditur se hetimet për ngjarjen vijojnë dhe u bëri thirrje qytetarëve që kanë informacion të bashkëpunojnë me autoritetet.
Pas incidentit, Presidenti Trump, Zonja e Parë Melania Trump dhe Zëvendëspresidenti JD Vance u evakuuan me urgjencë nga salla në hotelin Washington Hilton.
Në një konferencë për shtyp, Trump e cilësoi autorin si “një person të sëmurë”, duke theksuar se ai u neutralizua nga agjentët e Shërbimit Sekret pasi tentoi të kalonte një pikë kontrolli sigurie i armatosur.
