Rreth 20 shkolla në qytetin Borlänge të Suedisë janë mbyllur përkohësisht pas kërcënimeve të marra nga autoritetet, duke ngritur shqetësime serioze për sigurinë në institucionet arsimore.
Bashkia e Borlänge konfirmoi se masa është marrë si parandalim, pas një kërcënimi të mundshëm për akte dhune ndaj shkollave. Janë mbyllur 16 shkolla publike, ndërsa edhe disa institucione private kanë pezulluar mësimin.
Policia suedeze ka nisur një hetim paraprak për “kërcënime serioze të paligjshme ndaj një grupi”, duke deklaruar se po verifikohet serioziteti i informacionit të marrë.
Autoritetet theksojnë se situata po monitorohet nga afër dhe shkollat do të mbeten të mbyllura deri në një vlerësim të ri të rrezikut.
