Liverpool po shqyrton mundësinë e një oferte të madhe për Michael Olise, por Bayern Munich nuk ka ndërmend ta shesë yllin e tij, pavarësisht interesimit të anglezëve.
Sipas presidentit të nderit të klubit bavarez, Uli Hoeneß, një transferim i tillë është pothuajse i pamundur. Ai u shpreh se Bayern nuk ka asnjë interes të forcojë një rival të mundshëm duke lejuar largimin e lojtarit.
Në kërkim të një zëvendësuesi për Mohamed Salah, Liverpool ka hedhur sytë nga Olise, i cili po shkëlqen në krahun e djathtë dhe konsiderohet një profil ideal për stilin e lojës së “Të Kuqve”.
“Edhe nëse këto raportime janë të vërteta, gjë për të cilën kam dyshime, ne nuk do të kontribuojmë që Liverpool të bëhet më i fortë sezonin e ardhshëm,” deklaroi Hoeneß.
Klubi anglez ka investuar ndjeshëm në merkato, duke shpenzuar shuma të mëdha për disa përforcime gjatë verës së kaluar, por drejtuesit e Bayern mbeten të vendosur për të mos negociuar për Olise.
Sulmuesi francez iu bashkua Bayern Munich nga Crystal Palace në verën e vitit 2024 për rreth 50 milionë euro. Ai ka kontratë deri në vitin 2029 dhe nuk ka klauzolë largimi.
Performancat e tij kanë qenë mbresëlënëse, me gola dhe asistime të shumta si në Bundesligë, ashtu edhe në Ligën e Kampionëve, duke tërhequr interes edhe nga klube të tjera të mëdha evropiane, përfshirë Real Madrid.
Megjithatë, drejtuesit e Bayern janë të bindur se lojtari do të qëndrojë, duke theksuar se klubi ofron gjithçka për të luftuar për trofe dhe për të zhvilluar më tej lojtarë të nivelit të lartë.
