Pas viteve të tëra si një nga zërat mbrojtës të Kremlinit, avokati rus Ilya Remeslo ka bërë një kthesë drastike, duke sulmuar hapur Vladimir Putin dhe duke kërkuar dorëheqjen e tij, si dhe gjykimin për krime lufte.
42-vjeçari, i njohur më parë për sulmet ndaj kritikëve të regjimit, publikoi një manifest në Telegram me titull: “Pesë arsye pse ndalova së mbështeturi Vladimir Putinin”. Në të, ai e cilëson liderin rus si “president të paligjshëm” dhe e fajëson për dështimin në Ukrainë, rrënimin ekonomik dhe forcimin e një sistemi autoritar.
Në një deklaratë për The Guardian nga Saint Petersburg, Remeslo u shpreh:
“Vladimir Putin duhet të japë dorëheqjen dhe të gjykohet si kriminel lufte. Sistemi i tij i korruptuar është i destinuar të shembet.”
Ai shtoi se vendimi për të folur erdhi gradualisht:
“Putini nuk është më ‘njëri prej nesh’. Interesat e tij janë të huaja si për Rusinë ashtu edhe për mua personalisht.”
Kjo dalje publike konsiderohet e rrallë dhe e rëndësishme, pasi kritikat e hapura ndaj Putinit brenda kampit pro-Kremlinit janë pothuajse inekzistente. Fillimisht skeptike, reagimet e opozitës ndryshuan kur bashkëpunëtori i Alexei Navalny, Leonid Volkov, pranoi seriozitetin e deklaratave.
Remeslo deklaroi gjithashtu se është i përgatitur për pasoja ligjore:
“Jam gati për çdo gjyq. Është koha të flasim hapur. Mbaj edhe unë përgjegjësi që e kam mbështetur këtë regjim.”
