Situatë e vështirë për Bayern në prag të ndeshjes së kthimit në Champions League ndaj Atalanta, pasi skuadra bavareze po përballet me mungesa serioze në repartin e portës.
Portierët kryesorë, Manuel Neuer dhe Sven Ulreich, janë të dëmtuar, ndërsa gjendja e alternativave të tjera mbetet e paqartë. Për këtë arsye, trajneri Kompany po shqyrton një zgjidhje të pazakontë: aktivizimin e talentit 16-vjeçar Leonard Prescott.
Portieri i ri, me gjatësi 196 cm dhe shtetësi gjermano-amerikane, mund të bëjë debutimin e tij të parë në futbollin profesionist pikërisht në një kompeticion madhor europian. Nëse aktivizohet, ai do të vendosë një rekord si një nga portierët më të rinj që ka luajtur ndonjëherë në këtë turne.
Megjithatë, përfshirja e tij nuk është vetëm çështje teknike. Për shkak të moshës, kërkohet një autorizim i veçantë ligjor në Gjermani, pasi rregullat për punësimin e të miturve vendosin kufizime të forta. Një rast i ngjashëm ishte ai i Lamine Yamal gjatë UEFA Euro 2024, kur u dha një përjashtim i posaçëm për aktivizimin e tij.
Edhe pse fitorja 6-1 në ndeshjen e parë i jep një avantazh të madh Bayern-it, vëmendja kryesore pritet të jetë te talenti i ri. Vendimi final për aktivizimin e Prescott do të merret në momentet e fundit, në varësi të gjendjes fizike të portierit rezervë Urbig.
