Rusia po i afrohet një momenti të zymtë historik: nga mesi i janarit, ajo që presidenti Vladimir Putin e quan “operacion special ushtarak” në Ukrainë do të ketë zgjatur më shumë se lufta në Frontin Lindor gjatë Luftës së Dytë Botërore, e cila nisi me pushtimin gjerman të Bashkimit Sovjetik në qershor të vitit 1941 dhe përfundoi me rënien e Berlinit në maj të vitit 1945, shkruan CNN.
Putin njihet për fiksimin e tij me Luftën e Dytë Botërore dhe nderimi zyrtar i fitores sovjetike ndaj Gjermanisë naziste është një nga shtyllat ideologjike të shtetit rus.
Në Rusi është parë edhe rehabilitimi i figurës së Josif Stalinit, diktatorit komunist që udhëhoqi vendin gjatë asaj që në Rusi njihet si Lufta e Madhe Patriotike.
Megjithatë, gati katër vjet pas nisjes së pushtimit të plotë të Ukrainës, Kremlini nuk ka arritur një fitore vendimtare. Rusia kontrollon rreth 20 për qind të territorit ukrainas, ndërsa lufta vlerësohet t’i ketë kushtuar Moskës mbi një milion viktima.
Një tjetër goditje për objektivat e Putinit është fakti se presidenti ukrainas Volodymyr Zelensky mbetet ende në pushtet.
Pavarësisht kësaj, në fund të vitit Putin po shfaq vetëbesim, duke lënë të kuptohet se koha është në favor të tij dhe se fitorja është e pashmangshme.
Në një intervistë për “India Today”, dhënë përpara një samiti me kryeministrin indian Narendra Modi në dhjetor, Putin deklaroi se Rusia do të “çlirojë Donbasin dhe Novorossiyan në çdo rast, me mjete ushtarake ose të tjera”. Ai përsëriti kërkesën për të marrë të gjitha rajonet e Ukrainës që Moska i pretendon, përfshirë edhe ato që trupat ruse nuk i kanë pushtuar.
Kjo qasje shihet nga analistët si pjesë e një strategjie negociuese. Putin është i vetëdijshëm për përpjekjet e presidentit amerikan Donald Trump për të arritur një marrëveshje mbi Ukrainën dhe po përpiqet të përfitojë maksimalisht nga dëshira e Uashingtonit për t’i dhënë fund konfliktit.
Në konferencën e tij të fundvitit, presidenti rus tha se vendi i tij ishte gati “ta përfundojë konfliktin me mjete paqësore”, por njëkohësisht pretendoi se forcat ruse po “avancojnë përgjatë gjithë vijës së frontit”.
Sipas vëzhguesve, një nga arsyet kryesore të këtij vetëbesimi është dobësimi i unitetit perëndimor në mbështetje të Kievit, i cili ka shfaqur çarje të dukshme pas ardhjes në pushtet të Trump në fillim të vitit.
