Një zjarr i fuqishëm pyjor në veriperëndim të Los Anxhelosit, i quajtur “Canyon Fire”, ka detyruar mijëra banorë të evakuohen, ndërsa temperatura ekstreme dhe thatësira po përshpejtojnë përhapjen e flakëve.
Autoritetet kanë urdhëruar evakuimin e më shumë se 2.700 banorëve, ndërsa 14.000 të tjerë janë paralajmëruar të përgatiten për evakuim. Deri më tani, 25% e zjarrit është vënë nën kontroll, sipas Shërbimit të Zjarrfikësve të Qarkut Ventura.
Temperaturat pritet të shkojnë deri në 37.7°C, sipas Shërbimit Kombëtar Meteorologjik, gjë që po e vështirëson ndjeshëm punën për shuarjen e flakëve.
Qyteti Santa Clarita, një nga zonat më të afërta me vatrën e zjarrit, është në gjendje të lartë gatishmërie. Autoritetet u kanë kërkuar banorëve të qëndrojnë larg zonave të prekura dhe të respektojnë urdhrat për evakuim.
“Nëse ndodheni në Santa Clarita, Hasley Canyon apo Val Verde, merrni seriozisht çdo urdhër për evakuim. Kur t’ju thonë të largoheni, ikni menjëherë. Mos rrezikoni jetën tuaj,” shkroi inspektorja e qarkut Los Anxhelos, Kathryn Barger, në rrjetin social X.
Deri në mbrëmjen e së enjtes nuk janë raportuar dëme në shtëpi apo persona të lënduar, sipas autoriteteve të zjarrfikësve.
“Canyon Fire” është një nga shumë zjarret aktive në Kaliforni, ndërkohë që më i madhi, zjarri “Gifford”, ka djegur afro 100.000 hektarë në qarqet San Luis Obispo dhe Santa Barbara.
Ekspertët pohojnë se ndryshimet klimatike po bëjnë që zjarret në Kaliforni të jenë më të shpeshta, më të fuqishme dhe më të vështira për t’u kontrolluar, për shkak të motit më të thatë dhe më të nxehtë.
